பெண் மகவு

காதல் வாழ்வின்
கற்பனை பறவையாய்
கரங்களில் சேர்ந்து
சிறகுகள் விரித்த
சின்ன தேவதையே!
வருக! வருக! இப்பூமிக்கு!

உன் முதல் அழுகை எனும்
பேரானந்த ஒலி கேட்டே
மீண்டும் உயிர்த்திருப்பாள்
பிர'சவ' வார்டில் உன் அன்னை!

எகிறிய என் இதயத்துடிப்பை
உன்னை கரங்களில் அணைத்தே
கட்டுப்படுத்தினேன்!

பெண் தேவதையே - உனை
கண்களில் கண்ட மகிழ்வினை
கண்ணீர் மொழியில் பகிர்ந்தேன்!

எங்களின் இன்னொரு உயிராக
புனிதம் நிறைந்த
பெண் இனத்தில் உதித்தவளே!
வருக! வருக!

நெஞ்சில் அணைத்து,
தோள்களில் தூக்கி
கொஞ்சி மகிழ்ந்து
முத்த மழையில் நனைத்து
அன்பில் உனை ஆட்கொள்ள
காத்திருக்கிறோம்...
அன்னையும் நானும்!

மழலை மொழிபேசி மகிழ்விக்க
வாடி ராசாத்தி!
சிரித்து வாடி ராசாத்தி!

#பெண்_மகவு